Presidenti i Kosovës, Hashim Thaçi, më 21 dhjetor kishte pasur një takim të paraportuar diplomatik në Berlin me ambasadorin amerikan, Richard Grenell, person i afërt me presidentin Donald Trump.
Lajmin e bëri të ditur në një artikull, The Washington Post. Thaçi atje ishte zotuar se do Kosova do ta heqë taksën prej 100 për qind ndaj mallrave serbe.

Në një deklaratë për The Washington Post, ambasadori Grenell tregon se çfarë kishte biseduar me Thaçin gjatë këtij takimi në Berlin.

“Presidenti Thaçi dhe unë folëm për rëndësinë e marrjes së vendimeve afatgjate në vend të veprimeve afatshkurtra. Isha i kënaqur që ai u pajtua dhe do të angazhohet për heqjen e tarifave të vendosura së fundmi mbi produktet serbe”, shprehet Grenell.

“Kjo lëvizje do të ndihmonte që të dërgoheshin sinjalet e duhura që ai është serioz për negociatat dhe në ndërtimin e besimin ndërmjet palëve”.

Me paralajmërimin për heqjen e Taksës, para nisjes së fazës që konsiderohet përfundimtare në bisedimet Kosovë-Serbi, në Bruksel, Thaçi e ka sfiduar kryeministrin e vendit, Ramush Haradinaj.

Shefi i ekzekutivit kosovar kishte deklaruar se taksa prej 100 për qind ndaj Serbisë do të hiqet vetëm kur shteti fqinj ta njohë pavarësinë e Kosovës.